平時Sales同大家Sell機多，究竟佢哋自家又用乜機呢？老實講！佢哋閱機無數，買得落手一定有番咁上下，絕對可從中偷師，成為買機指標都未定。
記者、攝影：朱崇德
之前用開Mo記隻E1000，救命！介面煩、備用時間短，結果當然係快「放」啦！咁啱有行家平放N70，全新行貨、筍讓$3,200！須知半年前街價仲做緊$4,180㗎！原本諗住「過河濕腳」賺個差價，點知攞到上手見佢幾靚仔，咁就中咗！
好多人話近年諾記啲機軟件成日出問題，我就打出打入又玩SMS，都冇試過Hang機，部機最鍾意佢個使用時間長，平均2日叉電一次冇問題！之前都用過好多唔同牌子機，我覺得佢嘅話音明顯係最靚嘅！雖然鏡頭只得200萬像素，可能個26萬色芒做得靚，不論Movie、影相都同SHARP有得揮！而且攞佢出嚟蒲好少同人撞機，真係威過一排！
愛機：NokiaN70
評語：買咗冇後悔過，仲想升級N80。
筆者按：
𠵱家嘅人買手機，多數追機款！見到佢條頸繩係GUCCI名牌，索價$998！佢話「行頭」嚟，幾貴都要畀！如果LV有出頸繩，佢都會飛身即刻買！
啱啱出咗呢部OLYMPUSE330！日本好多大廠都有出單反數碼機，有啲標榜「利」、有啲就話玩「柔」，我就覺得OLYMPUS比較中庸啲，而且更重要係色彩表現自然「無添加」，唔會夾硬幫你張相加色咁雞精，呢啲先係「原」美嘅表現！另外單反數碼最忌換鏡頭時入塵，佢個內置電子除塵亦相當有效！不過最正係佢個機背LCD，設計成有上下反同「睇住影」功能，暫時大機中唯佢獨有，影相攞位方便好多。
愛機：OLYMPUSE330DSLR
評語：單反機中唯一玩反芒、LiveView，夠晒方便。
筆者按：
𠵱家市面E330跟標準鏡Kit裝約賣$8,680，仲送1GBxD卡、讀卡器、原裝袋同OLYMPUS相機帶，據知仲有講價空間㖭！想出機記得要講價！
