中大評議會六月初選舉，上次選輸咗嘅黃世澤今年成功當選，聽講呢個結果令唔少搞民間團體嘅中大校友失望。八方同黃生好唔熟，但傳聞喺「六四」燭光集會嗰日，黃世澤企圖舉拳襲擊一個民間組織嘅女義工，好彩有人喝止佢，最後冇事發生。
八方聽到咁激嘅傳聞梗係唔會即刻信，後嚟民陣嘅李偉儀喺報紙寫過呢單嘢，又好似有啲真實性噃，雖然黃世澤堅稱個義工挑釁佢，佢絕對冇打人。大家都希望呢個指控唔係真啦，如果事情屬實，真係擔心中大評議會變咗台灣立法院，睇怕到時連會都開唔成。
黃世澤喺中大政治及行政學系有教part-time，佢寫文通常叫自己做中大兼職講師。八方聽聞，有啲政政系教授對佢有啲啲意見，因為佢教嗰個course已喺上年上學期結束，下年搵唔搵佢教仲未知，但佢仲周街自稱係中大兼職講師，好似太老定。
傳真︰2623-9278
電郵︰[email protected]