舊年政府成立咗個小組，研究一吓香港有冇需要制訂全面或者跨界別嘅競爭法，咁通常呢啲法規，都係唔想啲大企業壟斷市場，等中小企有多啲生存空間。
點知，大企業未開聲SayNo，代表中小企嘅中華廠商會，就率先走出嚟反對，你話世事幾奇呢又。
話說廠商會會長洪克協喺5月號會訊裏面講，只有少數或者個別行業，先有價格操控情況，而呢啲行業，通常都要好有錢嘅大企業先入到場（即係好似超市咁啦！），競爭法用喺呢啲行頭就得，但對於其他行頭，多一重法規，即係少咗好多靈活性同自由度，咁對中小企仲不利，所以要反對！
洪會長又話，如果真係立咗例，日後有乜事，照理都會搞上法庭，咁大企業財雄勢大，中小企就算有理都畀唔起律師費啦，咪即係捱打。照佢咁講，條例仲使唔使立呢？