中環蘭桂坊唔單止吸引本地消費，亦都係旅遊熱點，地舖當然搶手。中原地產講，德己立街原本由杏花樓租用嘅700方呎舖，租約年尾到期，最近由環球連鎖食肆集團搶到手，租金由現時每月10.8萬升到17.5萬，呎租250蚊，升幅有62巴仙。
當然，做生意有時難得搵到好舖，而全港只有一個蘭桂坊，租金升得高都無辦法，今個月初德己立街38至44號有間酒吧續租，租金更加升一倍，去到每月40萬。由於呢處放租嘅舖位極少，僅餘650方呎嘅德己立街41號舖，呎租叫價亦去到230蚊。
至於一樣好多本地人同遊客都去嘅尖沙嘴，最近招標嘅樓上舖「流尚店」全幢物業，代理繼續谷宣傳，據講有好多投資者想捷足先登，想喺截標前攞到手，但係業主仍然堅持云云。結果如何，下個禮拜五截標就知道。