巴拉圭首戰對英格蘭時，畀華度感覺係一無是處；但呢日鬥瑞典，行家畀料，千祈唔可以睇小呢支南美洲球隊。
雖然巴拉圭陣中嘅希度華迪斯及後備入替嘅古華斯，對英格蘭時有幾腳顯示出唔錯嘅個人突破能力，但係足球踢整體，世界盃又有幾多個馬勒當拿呢？
「首仗未達正常水準」
其實巴拉圭打成咁，亦令華度有啲意外。照計呢班波本身南美風格好重，贏唔到都應該可以搓波搓到你暈；甚至乎賽後一啲南美記者亦都同華度講，巴拉圭呢日演出只係水準以下，可能係唔太專心，畀英格蘭搶贏咗個中場優勢。佢哋仲話嚟緊兩場分組賽，巴拉圭肯定會有進步演出！
話時話，德國呢邊天氣一日熱過一日，已經突破攝氏30度，見到唔少歐洲球隊球員，出現頻密返場邊攞水飲情況。巴拉圭對英格蘭嗰日，法蘭克福都有接近攝氏30度高溫，但係班巴拉圭球員飲水情況就無英格蘭咁誇張。呢日巴拉圭面對嘅對手，係來自北歐嘅瑞典，可能真係好似班南美記者咁講，巴拉圭得到天時之助，又有一次令人意外演出。
德國呢邊，走咗幾間博彩公司，巴拉圭贏波賠率都遠高於馬會個3.25倍，起碼都有3.6倍以上。睇番首輪賽事，上盤戰果佔大多數；嚟到第2輪，下盤應該多番啲嘞啩。
文：華度
採訪隊推介
聰仔心水：英格蘭主勝
華度心水：巴拉圭（下盤）