前晚終於等到巴西亮相！可惜嘅係令好多巴西躉失望收場，前鋒朗拿度更加全場等同失蹤，相信同「大哨」成日畀人批評佢肥咗有關。
朗拿度喺場上個樣已經成日恰眼瞓，喺電視機入面嘅佢又真係好似大咗半個size，走起上嚟好似唔係好靈活。原來𠵱家「肥哨」體重過咗成180磅，比起02年嘅佢足足重咗11磅咁多，好明顯真係肥咗，佢死口唔認都要接受事實。
世盃前好多傳媒話朗拿度肥，就連巴西總統都有份踩多兩腳，不過「肥哨」好鬼小氣咁話俾人寸足3年已經好悶，希望傳媒朋友可以收口。點知前晚對克羅地亞自己又唔爭氣，全場只係射過1次龍門咁大把，想唔認肥都唔得。就連對手嗰位「唔係好郁」嘅32歲老將羅拔高華賽後都串佢：「朗拿度？超！佢好易mark咋嘛！」朗拿度真係要爭氣啲，做啲成績畀人睇吓囉！
專家話：操起狀態冇問題
「朗拿度比02年重了11磅，但『大哨』是一個大賽球員，狀態能逐場賽事提升，故問題並非太大；朗拿度就好像92年歐國盃丹麥球員過肥一樣，分組賽時能寓賽於操，及後便會愈打愈弗。」
丘健威（前香港足球先生）
網民反應：下場最好打後備
網民點睇「肥哨」今場表現呢？
「我想問朗拿度成場波去咗邊？」「佢全場只係射過1腳波，我覺得佢下場最好打後備。」「朗拿度明顯唔喺最佳狀態，我諗佢慢慢就會操起。」