大家作為《金手指》fan屎，都知道孫柏文日光日白嘅時候，就係一個財經口水佬。不過一到夜晚，就變身成為超級戰士「白銀文」，帶領各位「白銀戰隊」成員去對抗世界各國中央銀行創造出來嘅「紙幣狂魔」。呢隻「紙幣狂魔」就係會蠶食大家辛辛苦苦賺番來啲錢嘅購買力，方法就係用通貨膨脹令到大家袋裏面嘅紙幣可能冇少過，不過可以買到嘅嘢就少咗。
咁大家可能會問：「點解『白銀文』只會喺夜晚出現？」問得好！哈、哈！因為聯儲局為首嘅眾中央銀行，多數都係去到紐約開市時間，先會叫「紙幣狂魔」出招打壓銀價，咁紐約開市就係我哋特區夜晚時分，所以「白銀文」多數都係夜晚先至變身出現。
央行反擊製造假象
大家要明白，呢場戰爭會非常之漫長，大家一定要有心理準備各國中央銀行有時候都會反擊，叫「紙幣狂魔」同佢啲同黨去製造購買力上升嘅假象，即係要所有買得嘅嘢啲價錢跌、跌、跌。而我相信大家都知道，呢排「紙幣狂魔」宰殺咗好多唔聽「白銀文」指揮，冇買實貨白銀而係走去用孖展買白銀嘅「白銀戰隊」成員，因為銀價呢排真係跌咗好多。
銀價跌咗幾多？跌到觸發「白銀文」自從為大家用隻金手指篤出來，建議買入白銀以來，第一次叫大家「趁低吸納」。當時，為慶祝《金手指》一欄由每個星期一次，變成日日都見大家，我喺3月6日建議大家買白銀。當日，我亦已經講過白銀每一次升，我都會出來邀功，每一次跌，我都會叫你「趁低吸納」。今日，我就係叫大家「趁低吸納」。
近200日線就可入市
睇番銀價，銀價卒之跌番落去佢嘅200日平均線，係《金手指》一欄面世之後嘅第一次。我曾經講過，如果大家想喺由2001年開始，將會歷時十多年嘅原材料大升浪當中搵錢，當然就係買實貨白銀，而最好嘅入市時間，就係銀價貼近200日平均線。所以今日我就用番以前做股票分析員時候嘅口脗，「重申目標價」。
仲有，雖然大家都知道「紙幣狂魔」耐唔耐會瘋狂拋售白銀，去打壓銀價。而每一次打壓成功之後，大家都會見到「紙幣狂魔」拋空白銀嘅數量都會減少，因為佢哋高位拋空之後，就會喺低位接啲被人斬咗倉嘅貨。不過今次就唔同，就算銀價下跌，拋空咗嘅白銀數量都冇減少，最簡單嘅解釋方法，就係雖然有好多白銀被拋空，不過完全係得「紙幣狂魔」拋空。意味着，如果「紙幣狂魔」都要買貨去填番拋空咗嘅白銀，根本就冇人賣貨畀佢，到時銀價就會升。最後為大家提供兩個圖表，千祈唔好以為兩個圖表係一樣，第一個圖表就係01年到04年嘅銀價走勢圖，如果唔識嘢，就一定以為白銀喺04年，8.5美元一盎斯「泡沫爆破」。第二個圖表就係06年嘅今日，希望大家一睇就知點做！
（重申）建議買入：白銀
目標價：每盎斯120美元
年期：至到2016年3月6日
孫柏文