我唔算係球迷，亦冇賭波，但係到咗世界盃，冇計，晚晚做夜鬼，惟有等到七月先至嚟一次總結性睡眠喇。朋友碰到面實會問今屆冠軍會係邊隊，好多人都話會係巴西，我都係咁睇。不過世事嘅嘢好難講，你睇吓日本一球在先，但係最後八分鐘俾澳洲連追三球。不過我都係睇好巴西，有神秘公式計㗎。
1998年世界盃咪喺法國打嘅，開賽前英國出咗個公式。嗱，計計數，巴西最近兩次攞盃係1970同1994年，1970+1994=3964；阿根廷呢？係1978同1986年，1978+1986=3964；德國呢？係1974同1990年，1974+1990=3964。
記住係3964呀，唔係8964。
當時英國佬就用呢條公式推算，3964-1998=1966，1966年嘅冠軍係英格蘭，照咁計1998嘅冠軍應該係英格蘭，點知最後冠軍係法國，真係人算不如天算。不過咁喎，2002年咪喺日本同南韓打嘅，嗱，3964-2002=1962。1962年冠軍係巴西。2002年攞盃嘅就係巴西，又真係幾奇。
我知道大家已經計緊3964-2006，答案係1958年。1958年冠軍係唔係巴西呢？係。
嗱，呢個數玩吓好啦，迷攞嚟賭呀。
最近日本話佢哋嘅目標係2050年攞世界盃。當然，人哋有目標係好事，做人都應該係咁。但係點解計得咁準？唔通要慶祝對日本嚟講好緊要嘅嘢？定係佢哋要收購全球球星嘅精子去培育新一代天才波神？咪以為我講笑，美國曾經有人搞過天才精子庫，就係想生多啲天才。香港政府其實除咗可以輸入精英仲可以諗吓輸入精子。
好，你日本話2050年，咁我哋又計吓數，3964-2050=1914。1914年係就係世界，不過唔係世界盃而係世界大戰喎。況且，第一屆世界盃係喺1930年辦嘅，咁即係點呢？如果3964計算唔可以早過1930年，咁即係3964-1930=2034。
唔通嗰一年係世界末日？
唔怪得霍金叫我哋移民月球。
霍金話㗎，我哋地球人可以喺二十年內喺月球建基地喎。哈，日本仔都算好嘢，佢哋話2050年攞盃啫，佢哋冇話喺邊度攞盃喎，原來喺月球。
我哋去到月球記得起多幾個球場。世界盃唔再係世界盃而係宇宙盃、太空盃、黑洞盃……。
定係霍金盃？
觀火
傳真︰2623-9278
電郵︰[email protected]