荃灣爵悅庭二手業主，呢頭先至話勁蝕200幾萬收場，嗰頭又話短炒1個月，賺過百萬脫手，同一個盤喺呢一兩年間買入，賺同蝕竟然可以相差咁遠，都係發展商上個月劈價惹嘅禍。
爵悅庭上個月劈價約三成散貨，300幾個貨尾一下子沽清，其中約有60個單位，即時喺市場放售，叫價比買入價嗌高約兩成，今個月初已經錄得首宗獲利成交，原業主賺38萬摸出，升值近一成。噚日嗰宗仲犀利，美聯梁仲雄話，北爵軒高層H室，1386呎，成交628萬，呎價4531蚊，原業主喺上個月貨尾劈價期間，以527萬買入，1個月內轉手，賺101萬，升值19%。
相反，喺04年買樓花嗰批業主，𠵱家放盤至少要蝕兩三成。𠵱家屋苑有800幾個放盤，佔單位總數一半，最終賺定蝕，就要睇佢幾時入，總之一句講晒，有人歡喜有人愁。
電郵地址：[email protected]