打工仔只要有料到又交足貨嘅話，人工高高都唔係問題，好似港交所周文耀咁，上任後388股價係咁升，冇人質疑佢獲得巨額嘅認股權；做唔出成績，但一樣𢭃千萬人工，都唔係問題；好似任總咁，只要質疑你能力嗰位，唔係你老闆就得。之不過，滙控環球證券研究部班分析員就無咁好彩，除咗俾老細插之外，仲搞到消息曝光見報，真係乜面都冇晒啦！
話說滙控環球證券研究部阿頭GrahamCopley，喺一封內部電郵度話，間行好多分析員，今年都唔應該出糧，事關佢哋唔單止出嘅分析報告數量少，仲經常冇料到！咁即係話班分析員九流兼懶囉。
聰明腦袋要醒定
咁都唔止，封電郵漏咗出街，俾英國《金融時報》再加多一腳，大大隻字，用「HSBCanalystsdonotdeservepay,saysboss」做標題，班夥計今鋪真係𤓓爆！
呢位開到聲鏟下屬嘅Graham，04年11月先入滙控，今年3月代替升任為環球研究部主管嘅DavidBurnett出任現職；喺佢領導之下，各位滙豐聰明腦袋真係要醒醒定定。
李華華