大家近日行經灣仔華潤大廈，唔知有冇見到恒生間綠油油嘅新分行呢？呢間滿月冇耐嘅新分行，係恒生更新品牌嘅第一擊，之後會分階段，陸續將所有分行改頭換面，預期5年內搞掂。雖則佢哋唔肯講會用幾多錢「扮靚靚」，但齋計80幾間有櫃枱嘅分行，同埋地鐵沿線24間分店嚟計，幾千萬都實冇走雞囉！
恒生話，今次主要目的，係想加強間行嘅年輕活力Feel，唔知係咪因為咁，所以專登搵個入咗恒生半年唔夠嘅新仔（助理總經理莫毅信）做項目負責人。
莫毅信話，分行內部裝修之外，個Logo會沿用番家吓嗰個，但應該會轉顏色，9月尾之前，大家就會見到。
除咗硬件，員工嘅制服都會換埋，至於點變法同埋幾時換，就要遲啲先公布得，但有一樣嘢可以透露嘅，咩嘢？咪就係套衫一定唔會用綠色囉。