公關大姐大通知，前輩編輯/專欄作家楊莉君女士逝世，家人將於六月二十七日傍晚為楊女士設靈，地點是紅磡萬國殯儀館，遺體於六月二十八日早上大殮、出殯。
很大部份讀者未必認識楊莉君，但對黎小田、黎海寧相信有認識，楊女士就係佢兩位嘅親愛媽咪。傳媒界中人稱呼楊莉君為楊大姐，一來佢資格老，喺《大公報》幾十年，傳媒界、娛樂圈、文化界無人不識，二來佢熱心助人，扶掖後進，對住左丁山呢類冇料充炮艇人士都非常好禮貌，有機會就提點幾句。某次有一位人士不幸在山邊失足跌死，因人名與左丁山有幾分相似，佢立即打電話畀大姐大，查問一番，關切之情，溢於言表，連大姐大都感動埋。上一輩人多數好好禮貌，我哋呢一輩自認不如，我哋下一輩？好似再冇人講尊敬、尊重呢類概念咯噃，講多幾講，可能畀人話老套，阻住地球轉㖭。此正是為甚麼有人（年紀大啲）覺得森美玩到出火，離晒譜，但亦有人（年紀輕啲）為森美辯護。
老前輩又唔見一個，買少見少。聽完公關大姐大傳來嘅消息後，出席一個開幕禮，主人家介紹認識一位大學講師（現在大學已採用美國式稱謂，以往嘅講師變成助理教授，如仍然稱為講師嘅，就係純粹講書教學，唔使做研究、寫論文。有啲教授不堪寫論文嘅壓力，自願變番做講師），講師話𠵱家時興搞培訓，有名氣之人只要攞番張沙紙，證明自己係某某課程嘅導師（instructor），就可以開班授徒，一個課程收二十人，每人收學費四五千，十分和味，講師自嘆不如，因為佢係教導副學士嘅，唔可以照足市場收費也。香港人原來好喜愛終身學習，乜嘢叫做有實用性、應用性嘅課程都有人讀。講師舉一個例子就係教人如何學習成功人士（highachiever）嘅說話技巧、身體語言與談判技術。左丁山聽完，哈哈大笑，如果肥佬黎肯教，又教得到嘅話，自己第一個報名。