南韓球迷每逢世界盃都特別狂熱，香港維園有得直播南韓對多哥嘅賽事，就見到佢哋嘅蹤影；法蘭克福球場呢邊嘅紅色球迷嘅魔力，就更加唔使講啦。4年前日韓世界盃已經見識過南韓球迷嘅熱情，今次南韓反勝多哥2:1嘅時候，在場球迷嘅興奮程度簡直陷入瘋狂。
冇波飛照去法蘭克福
法蘭克福市繼上次英格蘭大戰巴拉圭，球迷瘋狂慶祝導至發生醉酒鬧事後，相距3日又有南韓大戰多哥。不過，講到球迷嘅修養，英格蘭拍馬都追唔到南韓，起碼就一定冇流血衝突發生。呢班南韓球迷之中，原來都混雜咗唔少其他亞洲國家球迷，好似來自香港、中國等球迷，都俾我哋有線直擊隊搵到。
呢班為數7、8人嘅中港球迷，嚟咗德國已經差唔多1星期，佢哋就睇過墨西哥對伊朗、以及南韓對多哥兩場比賽。對於今屆世界盃氣氛，佢哋異口同聲用冇得彈形容。
講番南韓球迷，原來喺法蘭克福球場外有好多人都買唔到門票。佢哋一心為咗入場為國家隊打氣，一於嚟招「先斬後奏」，冇門票照樣先飛過嚟法蘭克福，睇吓臨場有冇奇迹出現，有得入場囉。
奇迹就梗唔會成日發生啦？今次呢班南韓球迷都唔例外，冇飛又點會可能入到場呀？佢哋由朝早等到比賽開始，都係徒勞無功，最後要當地工作人員，用韓文寫明所有門票售罄，先至識得死心。之後當然要到附近酒吧，嗱嗱臨搵個位睇番場波仲好啦。
有線06世界盃嘉年華，將於今晚7:00pm——9:00pm，播出世盃外景隊採訪滙報