添馬艦最近傳有二噁英，加埋政府老作有七成民意支持起新總部，搞到添馬艦有陰溝裏翻船嘅危機。冬冬噚日特登出嚟講，無證據話添馬艦地下積聚二噁英嘅，呢啲純屬謠傳，叫大家唔好信喎。
立法會𠵱家得番公民黨同郭家麒，唔肯輕易畀52億政府起總部。郭家麒話，政府明明冇做二噁英測試，淨係測試重金屬，又點可以咁肯定話冇？總部地下要掘到海床，如果有二噁英就好大鑊，如果政府死都要起，不如就將特首辦起喺地牢最底，等煲呔去擋住二噁英。
梁家傑近日同行政署長謝曼怡互片，謝曼怡前幾日覆佢，批評公民黨成日話總部造價過貴係歪曲事實，啲鋼材價同以前比都升咗唔少；傑哥就反擊話政府嘅指摘唔公平，公民黨啲數字好君真，鋼材只佔建築少部份，點可以咁比較呢？
傳真︰2623-9278
電郵︰[email protected]