睇埋周二巴西登場，以第一輪比賽計，除咗法國之外，英格蘭就係第二隊最唔對辦嘅前冠軍隊，首仗對巴拉圭只憑對手一個烏龍波小勝1:0，英格蘭球迷一定唔會收貨。
對手完全唔夠班
今場英格蘭對住支由英國次級聯賽組成嘅千里達，基本上只要贏波，就可以懶理瑞典對巴拉圭戰果，肯定晉級次圈，球隊可以有足足8日時間部署次圈賽事，又可以畀正選球員唞唞，真係爭好遠。再從走線睇，英格蘭為咗唔想16強就對住好大機會取得A組首名嘅德國，今場對住千里達，亦有大炒必要，因為世界盃分組賽，同分首先係計得失球，如果今場大炒千里達，英格蘭B組首名更加穩陣。
講真千里達首仗迫和瑞典，絕對只係假象，瑞典全場射門次數多達25次，只係前鋒伊巴謙莫域同柯碧克唔生性，先至俾人迫和。再睇千里達陣容，中堅丹尼士羅倫斯，踢緊英乙域斯咸，希斯納亦只係韋斯咸2號門將，林柏特、謝拉特又點會放佢在眼內。
厄軍心水入球細
睇完小弟講咁耐，係咪以為我會推介1.62倍「讓球主客和」的「主勝」？咁又唔係，睇番千里達對完瑞典，攞到世界盃第1分，球員簡直好似捧盃咁興奮，第二仗目標，就係入第1球，所以唔理輸幾多球，千里達都有鬥志去攻，我寧願犧牲0.02倍回報，揀個1.6倍入球「大」。
玩開大細，厄瓜多爾對哥斯達黎加個細都可以串埋，兩隊首仗都各攻入2球，今仗個入球大竟然有2.05倍，咁好分，擺明引入落叠，信開盤員就要1.68倍入球細啦。
牽牛