昨日大市喘定，但氣氛仍然唔係太好，小初亦冇咩心機，只係想快快返屋企睇波，橫掂家陣港股受外圍影響，半夜睇波時順便望望美股，或者有幫助都未定。
經紀黃話，大市今次調整跌得好急，唔少過去半年內急升嘅股票，幾乎都打回原形，不過亦有唔少基金股企得好硬淨，冇乜點跌過，全因芬佬不離不棄。今日除息的勤+緣（2366）就係其中一個例子。
媒體業務有賣點
勤+緣主力在大陸從事媒體事業，近年大力發展製作電視連續劇，最近又話簽咗倪匡嘅衛斯理小說版權。由於大陸電視媒體廣告市場發展迅速，呢類概念股有一定賣點。公司喺4月份最熱炒之時，以每股2.28元配股集資8190萬元，所以手頭應有足夠彈藥擴展業務。
勤+緣52周高位2.525元，昨日微跌1%，收2.35元，仍然高過配股價2.28元，當時接貨嘅芬佬，賬面仍然有得賺。
慕容小初