雖說世界盃熱潮勢不可擋，但其實又不是人人都喜歡睇波。像我這個不折不扣的足球白癡，被人問起世界盃看好哪隊？我會選荷蘭，因為貪他們的橙色球衣上街穿嫌浮誇，但襯起綠茵草地則啱啱好令色水夠起兼搶眼！最追捧哪位球星？老實說我往往熟悉他們的名模太太多一點，當然答碧咸、朗拿度和施丹實無走雞又穩陣。近來最有印象，是英格蘭的高治，除了因為他每次入球都會扮C-3PO跳舞外！還有一直不明白他身高1.98米，神高神大為什麼不去打籃球而走來踢足球，好彩他現在發展不俗，否則，不知會否後悔入錯行了？
面對我這些白癡球迷的獨家觀點，一班波牛朋友為防嘔血，這個月差不多已跟我斷絕來往。據聞網上有人設立「足球寡婦」網站，專為被睇波男友、丈夫冷落的女性提供互吐苦水平台。我真想籌組一個「足球白癡」網站或專欄連成一綫，專為一群像我不睇波不講波的苦悶弟兄，互相勉勵扶持，同舟共濟。在香港，不睇波的女性還可以去shopping，或者找三數姊妹攻打四方城，傾傾講講好容易又打發一晚時間。但男人不睇波，首先便要飽受別人歧視，這幾天裏，身邊每個人發現我原來不睇波，反應詫異，眼光總是又奇怪又曖昧，我的男性價值甚至是性取向在這一個月裏是四年一度的備受質疑和挑戰。另外，不睇波想約人上街消遣也困難重重，一來市面蕭條，約會氣氛黯淡；其次是女性友人對不睇波的男性印象，也有保留。有調查發現，年齡介乎20至45歲的香港人之中，有睇波習慣的男性是74%，女性則是4%。但到世界盃舉行期間，女性睇波比率卻急升是66%。當中大部份是陪男朋友或丈夫睇波，但我認為亦有不少是學睇波或扮睇波來提升自己在男性圈子中的融合性和吸引力！於是，連不睇波的女孩子都睇波了，我這個仍堅決死不睇波的男孩子，註定被遺棄和忽視，成為世界盃舉行期間的天煞孤星！