夏天一到，雪糕、凍飲紛紛出籠，一副不可不吃的姿態，其實突然間食啲激冷嘅嘢落肚好傷身，不如搵啲固本培元嘅食療法，為身體清熱利水，咁就真係由內涼到外。有乜咁消暑？冬瓜、薏米、豆腐為大路之選，細如芫荽都功效顯著，而且做法簡單，消暑？唔使開冷氣嘅！
記者︰劉昱蘭
攝影︰伍慶泉
Model︰Tania、Fiona（Salvador）
鳴謝︰海景嘉福酒店海景軒（27312883）
1.香荽雲南白肉片 料多做法易
價錢︰$30/4人
需時︰15分鐘（未計煲腩肉）
芫荽有清熱解毒功效，加埋凍食的五花腩肉片，暑氣全消，相都未影我就忍唔住食咗一片，諗住實俾梁師傅笑話我無禮貌，點知佢仲讚我醒目，啲汁浸住個肉片太耐會好鹹，所以喺屋企唔使咁講賣相的話，可以汁同肉分開點嚟食仲正。
材料
五花腩肉半斤、蒜頭6粒、葱2條、芫荽1條、辣椒3/4隻（切粒）、花生15粒、薑4片、香葉2塊、八角3粒、老抽1湯匙、豉油2湯匙、辣油、麻油、糖、鎮江香醋各1茶匙
簡易法
1.五花腩肉汆水撈起，爆香薑、葱花、八角、香葉後，落五花腩肉煲45分鐘，加水煮肉時要過肉面，煮腍後切片砌碟；
2.爆蒜茸至半生熟，辣油、麻油、老抽、豉油、糖及醋煮成汁，淋在肉上加芫荽、辣椒及花生。
貼士︰
想知五花腩肉熟未，可以用筷子拮吓佢，如果唔使好用力都拮得入，就即係熟喇，最好攤涼咗先切片會易切好多㗎！
2.冬瓜薏米雲吞湯 連皮煮最健康
價錢︰$25/4人
需時︰46分鐘（浸時及蒸時除外）
睇到冬瓜薏米的配搭，唔好以為係啲利尿解毒嘅行貨湯，加咗個雲吞就即刻唔同晒，冬瓜令雲吞肉味無咁重，有菜又有肉不知幾健康！
材料
冬瓜8両、雲吞6粒、蓮子12粒、生薏米1湯匙、雞湯3碗、鹽半茶匙
簡易法
1.蓮子同薏米先浸個半鐘，再蒸2個鐘；
2.冬瓜滾20分鐘至腍，雲吞則要收火浸4分鐘至熟，落雞湯；
3.將冬瓜及蒸好的蓮子、薏米滾20分鐘，然後落雲吞煮2分鐘，最後放鹽作調味即成。
貼士：
冬瓜皮比肉更有祛濕功效，所以滾湯時要連皮一齊放為最佳，而且又可以令冬瓜唔會散收收。
3.千層豆腐帆立貝 祛濕顯著
價錢︰$23/4人
需時︰15分鐘
梁師傅教路，凡係黃豆類食物，消暑祛濕嘅作用顯著，夏天必食。豆腐咁清易入口，夏天成日唔開胃，煮豆腐就最就手！
材料
鮮瑤柱6粒、魚乾仔1両、豆腐1件、黑芝麻11/2湯匙、薑3片、肉鬆1湯匙、葱半條、辣椒1/4隻、鹽1茶匙、糖1/2茶匙、生粉水1茶匙、清湯半碗、麻油少許
簡易法
1.魚乾仔浸水，加1片薑絲、2/3茶匙鹽及麻油去腥蒸熟；
2.黑芝麻切碎，用清湯爆香，加入糖、生粉水及鹽1/3茶匙略煮成汁；
3.鮮瑤柱連2片薑汆水5分鐘，熟後去枕、開二；
4.豆腐切片放碟底，開邊瑤柱放面，加上葱花及椒絲作裝飾，最後淋上汁、魚乾仔及肉鬆即成。
貼士：
瑤柱汆水時要收晒火浸熟，否則瑤柱就會縮水。個汁一定要攤涼先淋上個豆腐度，汁太熱會令豆腐變味。
4.青胡椒炒羊仔肉 走油代汆水
價錢︰$38/4人
需時︰10分鐘
好多人以為辣嘢驅寒，梁師傅就話食大量嘅的確可以，適量辣嘢就可解熱毒，君不見泰國天氣咁熱都興食辣嘢嗎？
材料
青胡椒6-8串、羊仔肉6両、洋葱半個、青椒大半個、紅椒1隻、薑1片、葱1條、蒜頭1粒、紹酒、生粉水各1茶匙、雞粉小量、蠔油半湯匙、糖1/3茶匙
簡易法
1.青胡椒、羊仔肉分別走油，後者至散開成肉片只需約1分鐘；
2.爆香紅椒、青椒、洋葱、薑、葱及蒜茸後，落青胡椒及羊仔肉略炒，加入生粉水、雞粉、蠔油及糖作調味再炒一炒，最後落紹酒即成。
貼士：
羊仔肉一定要走油唔可以汆水，否則就無晒肉味亦唔夠滑。