𠵱家世界盃開鑼，我阿利同親啲老友聚頭，只係講三樣嘢，就係講波、講波、同埋講波。鬼叫我哋呢班老嘢退咗休，大把時間，可以場場睇直播咩！
講到世界波，我身邊啲會計佬，無論大中細，都十分瘋狂。鬼咩，四年一次，加上𠵱家名正言順有得賭，梗係金睛火眼啦。雖然我阿利唔鍾意人賭波，但係見到佢哋班友仔講到眉飛色舞，唔怪得咁多人喜歡落注。
我見見埋埋佢哋啲反應，即時創出一條必殺方程式，方便女士擇偶。其精密程度，媲美霍金解釋宇宙大爆炸。
嗱，女士如果與一大班新相識朋友，出去酒吧睇波，只要留意一下幾點，就知妳心儀對象，係咪會計師。
首先，如果佢落注永遠都係細眉細眉，一百幾十，佢，係會計師嘅機會十分高。因為做得呢一行，個個都冇乜膽去瞓身博，唔似得有啲賭仔，場場幾百幾百上落。
另外，如果他買英格蘭，係會計師嘅成數又高啲，皆因好多老嘢都響英國返嚟，又或者深受英國佬嘅荼毒，對於英國隊，特別有感情。
仲有，假如他一見巴西就落重啲注，就十成十都係會計佬嘞，因為大部份會計佬都鍾意睇牌面，巴西隊逐個秤，贏晒，啱晒我哋嘅直線思維。
所以話，女士一見到以上特徵，就知面前嗰個係餓唔死但冇發達嘅會計佬。如果個樣生得唔樣衰，諗得過。