小初掛住睇波，所以半夢半醒，但仍然俾個市嚇到心驚膽跳，心裏面怨恨班日本仔，前晚輸波俾澳洲累小初輸錢就算啦，噚日日股又跌成600幾點，拖累埋香港大跌市。
雖然港股大跌近400點，但一樣有跌市奇葩，不過小初實在唔敢玩，坐喺度睇人表演，其中一隻逆市上升係中國星（326），隻股上周以0.365元配股集資，之後打橫行咗一陣，昨日抽高5.13％，早市收0.41元，跟住下午就停牌，話會公布一單非常重大收購。
經紀陳話，據講今次中國星停牌，係落實收購澳門金域酒店權益，所以中國星停牌無耐，持有金域酒店31.73％的永安旅遊（1189）亦跟手停埋牌，話就一項重大出售發表公布。
中國星家陣市值只有2.4億元，而今次收購金域作價以億元計，所以係重大收購。不過，小初唔知今時今日進軍濠江仲係咪咁利好，雖然中國星停牌前股價上升，但復牌後升勢能否持續，實在好難講，勿過份憧憬。
慕容小初