日本隊及美國隊慘敗後，美股及日股即刻大崩圍，唔通世界盃效應真係咁勁？杜指周一晚跌99點，收10792，首次跌穿250日線（現處10809）收市。日股昨日更出現恐慌性拋售，大跌614點或4.1%，收14218。
美股微穿250日線仍然有數講，但日股以大陰燭插穿250日線（現處14574）則比較麻煩，可能要跌至13800才喘定，往後走勢亦屬易跌難升。
港股受外圍拖累，昨日亦跌穿250日線（現處15282）收市，報15234，跌387點。恒指和杜指相似，目前只是輕微跌穿250日線，仍然有數講。美國周二晚公布5月份生產物價指數（PPI），以及聯儲局主席伯南克又講嘢，希望有好消息幫大市喘定。
日前提過中資金融股沽壓重，昨日大戶更全面拋售中資股，H指連6000點亦失守，收5953，大跌264點或4.25%，比日股跌得更多。H指250日線目前在5697，希望是今次調整的底部，唔使下試5000關。
港股毋須太悲觀
倉內的建行（939）昨日在3.275元沽出止蝕，建行最後收3.25元，跌2.3%。現時投資組合全持現金，等候低位買貨機會。睇番恒指基本數據現價往績PE11.8倍，預測12.4倍（Bloombery資料），只要息口不再大幅上升，港股仍是相當吸引，毋須過份悲觀，不過就擔心外圍美日股市繼續累街坊。
衍生工具近年急速發展，令市場變得更為複雜及更加波動，影響之下，股市升過龍及跌過龍的現象非常普遍，因此在參考基本因素之餘，亦要留意資金流向的趨勢，如果資金是持續流出，抵買的股票將會更抵買。揀到好股固然重要，但揀啱買入時機更重要。
趙飛雲