香港大學校友會挑戰盃，上星期六在馬場舉行，左丁山應邀到馬會廂房出席，碰到成村熟人，但係各位熟人原來係馬場陌路人，左丁山於是成為眾人師傅，講解貼士，教埋填飛。與學術界、傳媒界交往頻密而又係馬場通嘅，人數甚少，左丁山算係其中一個。後來碰到花旗大賓架C，佢又係對賽馬冇乜大興趣嘅，是日在馬會廂房出現，相信係港大邀請佢出席有關。港大工商管理課程起步較遲，去年開始急起直追，誓要迎頭趕上中大、科大，MBA課程與LBS（倫敦商學院）與哥倫比亞大學MBA課程實行更緊密接觸，故此加緊與銀行界聯繫。中大科大商科，遇上勁敵咯。
港大盛產名醫，醫生L不見多年，特登走埋嚟話舊，馬佢就唔識嘞，佢同左丁山講醫療融資，話非常擔心。醫生L老公亦係名醫，每在電視見到廣告話「四十歲退休」，就成個人跳起，話此風不可長。點解反應咁大呢？醫生L話：「我哋在公立醫院，每日接觸嘅都係基層、中產嘅病人，因需求太大，輪候入院要輪好耐，去私家醫院，佢哋負擔唔起，但佢哋長期使用公共醫療嘅話，醫管局亦負擔唔起。呢個死結，都唔知點樣解決！」醫管局主席胡定旭係會計師噃，諗融資辦法，會叻過醫生啩？但聽醫生L講一個例子，實在神仙都冇符，難為了胡主席。
當代藥物日新月異，治癌新藥，層出不窮，但呢啲新藥只可延長壽命（俗啲講就係吊鹽水），唔會根治癌症。有錢人日日食住新藥都得，但啲藥好貴好貴。可以係幾萬銀一個月（按：有啲藥丸喺美國賣九百蚊一粒，每日要食兩粒），小數怕長計，一百個病人就要幾百萬一個月；諗真啲，左丁山不寒而慄，有錢富豪唔怕藥物貴，基層病人有納稅人支持，中產病患者點搞？患上呢類病，食藥可以食到家人破產；醫生L話四十歲點退休吖，重起碼有四十年至五十年壽命，六十歲之後醫藥費可能食晒啲退休金㗎！