潮流興講終身學習同增值，乜嘢專業資格都要獲認可，仲要持續進修，連晨昏顛倒、揸住鑊鏟喺炒房搵食嘅財資市場從業員都唔例外，呢班司庫、sales同炒手，若要繼續做財資市場公會（TMA）會員，據講每年都要參加持續進修，攞夠5分先可以保住資格，咁佢哋個個都係大忙人，點樣解決呢5分呢？
嗱，喺幕後發起推動TMA成立嘅金管局，呢鋪就有筍嘢益街坊，據講下周四及五，金管局加埋世銀，會搞壇「東亞金融市場未來領域」研討會，任總同埋人行嗰位金融市場司穆懷朋，都會坐鎮，金管局除廣邀各銀行行政總裁出席外，據聞TMA亦向財資界發出英雄帖，話參加「一day半」嘅研討會，唔理你喺入面瞌眼瞓定流口水，都可以獲5分持續進修獎勵，夠今年續牌嘅要求。