香港人腦筋靈活，地產代理係表表者，晉誠地產察覺到荃灣急速變天，朗逸峯、寶雲匯、爵悅庭及樂悠居相繼入伙，加埋最新的萬景峯，生意唔憂做。
老闆張秋好醒目，喺大河道租到間單邊舖，約350方呎，仲有3個大招牌做宣傳，距離萬景峯僅一條街，一於「近水樓台先得月」。據聞，慢一步都畀行家租咗。
新舖啱啱今個禮拜一開張，稱為萬景峯分行，連同華景山莊、麗都花園、樂悠居分行，晉誠地產有4間舖，由葵涌做到青山公路，地域算廣。
不過，張秋補充，3年前第一間開嘅海濱花園舖，因為該處有13間代理行，競爭大，成交額鈿，以平均每宗150萬計，每月開幾張單，佣金夾埋得10幾萬，減埋皮費，實際係雞碎咁多，寧願轉移陣地，搬去荃灣市中心，擴大版圖，兼且成交銀碼大，搵得仲多。例如上個月做到單朗逸峯，成交價900萬，佣金18萬，好和味。
張秋話，現時公司約有30人，短期再招聘多10幾人，藉着增強人力資源與大行抗衡，希望達到主要屋苑市場佔有率佔三成以上的目標。所謂「有志者事竟成」，祝佢好運。