煲呔噚日批評班爭居港權人士"Notverygood."，但去到香港青年獎勵計劃度頒獎，就大舉拇指叫good，當然係話班年輕有為嘅後生仔啦，順便為自己拉吓票都好。一齊嚟嘅嘉賓仲有警隊一哥李明逵同夏佳理。一哥噚日走出個場嘅時候，突然下盤不穩跣腳，差啲喺成班行家前PK。一哥講笑話，唔知係咪有人喺背後跣佢，搞到佢差啲PK！煲呔就乜都唔講，問佢今朝睇唔睇巴西，佢都唔答。
世界盃踢咗幾日，唔少賽果都幾意外，好似打少一人嘅千里達迫和瑞典、一早開紀錄嘅英格蘭同葡萄牙，最後淨係小勝對手1:0、伊朗同日本臨尾一腳突然兵敗如山倒，搞到好多中場落注嘅賭仔輸晒，賭波公司就豬籠入水。賭王何鴻燊話，淨係世界盃開波呢幾日，佢間公司已經有唔少利潤！
賭王噚日同煲呔喺同一個公開場合，講到世界盃，賭王話睇好巴西奪標，相信其他隊都好難打啦，佢前日都有睇澳洲對日本，估唔到日本一路領先，去到最後幾分鐘竟然俾澳洲連入三球，輸埋場波。唔知係咪警惕煲呔，千祈唔好學日本仔，唔好以為自己一路領先，如果唔係分分鐘會輸番轉頭？
爆料熱線：29290000、27860099
報料傳真：26239278
報料電郵：[email protected]