嚟到第4日，今屆世盃球證嘅執法水準大致上冇咩嚴重過失，但周一嗰兩位就有啲問題出現咗，值得大家留意！
喺澳洲3:1擊敗日本嗰場波，前者第1個失球同門將舒華沙俾人撞開有絕對關係；而來自埃及嘅球證法塔赫亦即時道歉，表示自己睇番錄影帶時都覺得吹錯，累到澳洲好鬼死驚險先贏到波；但澳洲阿頭軒迪克好風騷咁話，球證都無辦法令佢哋贏唔到波，而且球證應該多謝上帝最後安排咗澳洲贏波㖭！無計啦，贏波梗係口響啲嘅，下次輸咗唔好賴人就得喇！
另1場意大利撼加納嗰位巴西球證西蒙都唔係路啦，賽前就警告托迪唔好插水，唔係實畀牌；點知最後托迪真係出場，不過係俾加納班硬漢踩傷出場，認真黑仔！老實講，西蒙先生真係吹得好鬆，好多埋身狂撞，雙腳攔截都冇吹，咁啱食正加納嗰家波，所以意大利拎到嗰3分，都真係靠「食力」贏番嚟。
判官話
我帶頭支持錄影帶翻播，尤其喺入球與否嘅重要判決，我哋係要公平、公正、公道嘅足球！
爭議指數：★★★★★
專家話：球證肉眼難辨
「當時澳洲禁區內人馬踏雜，球證在平面角度，要在千鈞一髮之間判斷是否犯規是困難事情，而我亦要在慢鏡始能清楚看到日本球員阻住澳洲門將舒華沙，故只能說句不幸。」陳譚新（82年世界盃球證）
網民反應：睇帶與否各持己見
網民反應：究竟球迷又係唔係鍾意睇錄影帶呢？「成日都睇，場波咪要打兩個鐘先完？」「有啲鏡頭睇重播可能嚇死人㗎！」「我贊成咗好耐啦！」「仲有好多問題要解決先實行到。」