亞洲球迷難分清？
法蘭克福有場南韓對多哥嘅「亞非」大戰，成街都係有色人種。喺外國人眼中，亞洲、非洲人嘅樣特別難認，情況就好似我哋睇黑人咁，個個樣差唔多。相中呢3個南韓小球迷，全部着晒國家隊打氣Tee，其中2個年紀較細嘅好得意，周圍同人揮手SayHi、3個成個餅印咁，我一睇就知佢哋係兄妹，唔知係外國人眼中又點呢？
李勇明
曾採訪世界盃、歐洲國家盃、奧運、亞運等大賽，身經百戰。
洗衫成唯一運動
日以繼夜工作，洗衫成了在德國的唯一「運動」。由於住處隔涉及簡陋，沒有洗衣服務外，亦沒有提供洗衣粉。到超市買洗衣粉，才發覺這邊的洗衣粉只供機洗，要手洗只有香港人較少用的洗衣水。記得有一次去了慕尼黑兩天，回到法蘭克福時，足足花了半小時洗衫。還好，洗衣水味道不錯，當洗衫是運動的話，都幾享受。
徐嘉華
採訪過無數大賽，最鍾意捐窿捐罅搵題材，今次德國之行啱晒我。
開工前先霸靚位
每日嘅辦公室就係各大球場新聞中心，第一件事要做就係早啲去到霸番個儲物櫃及工作靚位。事關唔將啲相機電腦鎖好，要孭住所有器材喺球場內走嚟走去的話，幾大隻都死！因為部份新聞中心同球場距離好遠，途中仲要上落4、5層樓梯。個位最好梗係同時睇到大電視及儲物櫃，以及方便收取出場陣容、賽後報告等文件，做嘢都會做得安心啲。
朱冠恆
肩負現場直擊畀料重任，無論你當我名家抑或明燈，都希望交到功課。
