工廠大量北移，物流業成為支持工廈租售市道嘅原動力，唔少大手租務交易，租客都係物流公司，啱啱又有一單，租用面積超過10萬呎，月租約59.8萬，簡直係市場難求嘅大客。
呢間物流公司承租嘅係屯門浩洋街96號珠江貨倉第2座地庫及低層，總樓面10.88萬呎，計落呎租約5.5。蘭西睇過地圖，附近有個新興鴻基貨倉，離民居都幾遠吓，咁睇租金唔算平。
不過，中原地產新界工商部助理營業董事張志傑話合理，原來呢處附近有碼頭，可以上落貨，而且仲有海關，咁啲貨運嚟呢度，清關就好方便。
佢又指出，珠江貨倉樓面負重較高，擺貨會有着數。
珠江貨倉第2座𠵱家再冇租盤，隔籬第1座都係得一個中層全層1.4萬呎單位招租，但係業主就叫到6.5元一呎。點解會咁少供應?因為業主自己用咗唔少樓面，同時有啲租客長租唔肯搬走，盤源自然少。
電郵地址：[email protected]