每年世界盃，都有新面孔同大家見面。今屆更加厲害，非洲方面就已經出現加納、多哥、安哥拉同埋科特迪瓦4位新丁，雖然其中有部份球員仲係失業大軍，但話唔定踢完世盃之後，俾大球會睇中就一登龍門，聲價十倍。
難得踢入世界盃，我都戥呢班非洲球員高興，不過就難為足球評述員啦。夜晚講波已經要捱得眼瞓，唔好掛住搵周公，加上大部份非洲球員名不見經傳，10個都唔知有冇1個識，有時記得個名，又唔認得個樣，講錯真係在所難免。
更頭痕就係今屆國家名都幾難讀，好似科特迪瓦、塞爾維亞和黑山，心急嗰陣，講到黐脷筋。所以話，唔單止女人唔易做，講波呢份工都幾惡啃。總之都係嗰句，世界難撈啦。
彭浩翔
電影導演