建行噚日雖然跟大市下跌，但係鏡頭一轉，佢喺新鮮出爐嘅「中國銀行100強排行榜」上榮登榜首，真係可喜可賀！據建行講，呢個榜係由英國《銀行家》雜誌，根據各銀行嘅綜合實力編寫喎，早前建行都攞咗同一雜誌搞嘅「中國年度最佳銀行獎」。
鏡頭又轉，啱啱攞完獎嘅建行，據內地報章《北京娛樂信報》報道，喺星期一朝早，建行總行嘅轉賬系統出現通訊故障，搞到中投證券全國200萬股民，無法轉賬交易，要到差唔多11點半，系統先回復正常。
建行事後解釋，話係因為正進行業務流程系統改造，所以搞到轉賬系統運行緩慢。華華就唔係好buy呢個原因，業務改造都要睇時間嚟做，唔係隨便做啩！不過，睇番報紙，好在禮拜一內地股市都唔係咁波動，若果唔係內地班股民仲唔嘈到拆天？