噚日晏晝中環真係藝術到暈，事關荷蘭銀行喺中國會宣傳「生活．香港」繪畫活動；一街之隔嘅中銀就喺大堂搞免費莫札特音樂會。荷銀派出香港區執行總裁夏慧蘭（圖）主持大局，仲安排咗幾十個着晒畫家服飾嘅小學生助興，又搵個專業畫家同場獻技。
荷銀個布景板原來係由100幅小圖組成，呢啲小圖由成百個小學生畫出嚟。荷銀話，希望收集到2500幅作品，然後搞展覽同出書籌款，善款會幫助香港特殊學習障礙協會。
至於喺自己地頭搞活動嘅中銀，華華就一個高層都見唔到，但可以請到香港管弦樂團4個樂師，即場表演1粒鐘，加埋靚女司儀（黃宇詩），吸引到近百個知音到場。
中銀話，4月喺銅鑼灣時代廣場搞過一場，今次轉個地點，估唔到反應唔錯；華華覺得，若果中銀班高層落埋場，演吓身手，相信反應會仲好，不妨諗諗。
程志遠攝