港股又再大跌，主要係俾美股同日股拖累，日股噚日急挫614點，跌幅4%，港股照跟。
好重要、好重要嘅250日線（15282）終於跌穿咗，喺第一個跌浪嚟講，呢個係好有啓示性嘅訊號，就係話大市嘅跌勢已接近尾聲，起碼要彈完先再落過。
股市噚日午後再現拋售，股民信心盡失，不過，通常到咗「心死」時候，大市就會唔經唔覺咁到底。
家吓唔少股票嘅跌幅都有4至5成，跟着而來嘅反彈，升幅都應該有2至3成，雖然升幅嘅實值同跌幅嘅差好遠，但博得中，亦好和味。
資產既豐且厚嘅大酒店（045），喺呢個跌市中，股價亦唔見咗16%（由9.85元落到8.25元），呢隻唔係嗰類大上大落嘅細價股，但博反彈，都有機會上番9元水平。想博大堆，就要吼啲過山車股；諗住穩穩陣陣嘅，大酒店同埋噚日推介嘅理文造紙（2314），都係選擇對象。
大酒店05年底每股賬面資產淨值10.5元，但擁有淺水灣兩幢豪宅，樓面共152萬方呎，只以呎價約5700元入賬，若以仍屬保守的豪宅呎價不少於12000元計，起碼增值95億元（以噚日收市價8.3元計，大酒店市值不足120億元）。
實值20元賣8蚊
當然，大酒店仲有好多酒店資產，亦一樣會升值，粗略估計，大酒店的每股資產實值應唔少過20元，股價8.3元，大折讓58%。
講股價，大酒店實在係好偏低，而講到PE，拍埋同類股香格里拉（069）一比，佢亦係好吸引。
大酒店05年（12月結）盈利26.64億元，其中包括投資物業增值、出售九龍酒店獲利，以及撥回準備合共近20億元，不計非營業項目盈利為6.41億元，每股盈利45.2仙。
06年，首季平均房租同入住率都上升，公司對全年展望樂觀，估計非營業項目盈利有7.5億元，每股盈利52.8仙，預測PE只係15.7倍，遠低過香格里拉的25倍。
山頂凌霄閣今年秋季可全面重開，而日本東京半島酒店年底完工，明年亦開業，07年盈利會繼續有理想增長。
郭兆誠