話咁快又到7．1，每逢呢啲敏感日子，佳叔都好鬼唔自在，因為佢03年同傳媒一口咬定，7．1遊行頂多三至五萬人，結果當日有成50萬人咁多，佳叔啲分析誤導晒中聯辦同中央，最後連老董都落埋台，真係貢獻良多。加入咗政府4年，冇乜人噏得出佳叔有乜過人嘅見解，但肯定記得佳叔亂噏廿四呢個笑話。
自03年7．1後，佳叔對呢件事耿耿於懷，成日覺得啲傳媒玩佢，佢係話有三至五萬人參加都唔出奇，結果俾人講成有三至五萬人參加，仲要俾人唱成世。佳叔噚日有個策發會吹風，有啲記者乘機翻佳叔舊賬，問佢點樣評估今年7．1？一聽到7．1呢兩個字，佳叔就好似見到鬼咁閃開話：「我𠵱家唔會做啲咁嘅嘢，你自己評估啦！」啲記者再追問，佳叔即刻急急腳鬆人。
佳叔雖然唔評論7．1，但八方聽聞佳叔友好話，佢一定唔會覺得7．1有乜大不了，因為由加入政府開始到今日，佢講得最多嗰句就係「香港形勢盡在預計之內」，無論係幾時佢都咁講，所以佳叔有個花名叫政壇安察洛提（即係AC米蘭領隊），因為無論佢隊波打成點，都唔影響佢表情，贏利物浦3:0係嗰個樣，俾利物浦追平3:3嗰樣都冇變，最後射12碼輸埋，都係嗰個樣。
當然𠵱家形勢同三年前差好遠，但佳叔都唔好咁老定，皆因禽流感又殺到埋深圳，一旦過咗邊境，到時都咪話唔驚。
竟然冇睇過「巴士阿叔」
佳叔入政府前，唔少人都期望佢，可以證明學者從政係得嘅！結果梗係令好多人失望，佢搞嘅社會凝聚力小組，唔單止凝聚唔到香港社會，仲整咗單7．1遊行，佢主持嘅策發會變咗阻撓普選嘅口水會，好似噚日就傾香港國際競爭力，來來去去又係講埋啲「阿媽係女人」嘅道理，但「巴士阿叔」怒吼四眼仔呢段揚威國際、衍生咁多創意商機嘅短片，佳叔竟然話冇睇過，咁嘅策發會係咪落後於形勢？
講番今年7．1，由於冇乜新議題，只係重申要求加快雙普選，所以公民黨湯大狀都擔心，就算呢兩個星期日日催谷，都未必叫到好多人上街，所以佢最希望佳叔佢哋講多啲冇厘頭嘢，咁就分分鐘激嬲班港人，威力比泛民自己講大幾十倍。
爆料熱線：29290000、27860099
報料傳真：26239278
報料電郵：[email protected]