嚟到世界盃分組賽第6日賽事，揀番場德國對波蘭同大家一齊研究。
先講波蘭，呢班波決賽周前，大家都會認為佢哋好大機會同德國一齊出線，點知打第一場波已經見到真章，佢哋成班波整體合作性唔強，部份球員更予人各自為戰嘅感覺，教練真拿斯嚟到決賽周突然轉用球員並用唔熟悉嘅451陣式，原意係希望可以加強中場力量，點知打落反而令到球員無所適從，進退失據，形成攻不銳、守不穩！
讓球「主勝」可敲
睇過德國隊第一場波後，見到佢哋班波防線真係令人擔心，中後場球員連繫性唔夠，不過好彩球隊勝在攻力夠勁，先有左閘拿姆出擊助攻，又有中場芬寧斯同舒韋恩史迪加嘅遠射，再配合埋兩翼側擊，中鋒高路斯頭槌接應，令到球隊攻擊模式更為立體，暫時喺分組賽事中，佢哋仲可以以攻為守。德國今場有波歷克復出，對於球隊中前場嘅組織能力同士氣一定有所提升，唔止咁，原來德國隊近85年來都未輸過畀波蘭，所以今場讓球主客和「主勝」可以一試！
阿占有線球彩台「06世界Bar」主持
今日播映時間：7:00pm至5:30am
PHONE波熱線：1831678