過埋今晚，32強全部登場，邊隊係龍邊隊係蟲，相信各位心裏有數；不過睇番香港時間9:00pm開賽嘅早場賽事，頭3場有2場開入球細，今晚頭場F組大戰西班牙對烏克蘭可再追細。
小弟問過身在德國嘅同事華度，佢話呢幾日德國天氣真係轉變得幾大，佢6月初抵達德國，日頭都只係攝氏15、16度，要着風褸至頂得順，但短短一個禮拜，德國日頭已經熱到同香港差不多，下晝有成30度，難怪頭3場早場比賽末段，都見到球員「莫」晒氣嘅情況，結果體力打折扣下，3場有2場都開細。
0:0/1:1心水波膽
講真喺F組，西班牙同烏克蘭，比較其餘2隊明顯超班，攜手出線應該冇問題，但西班牙同烏克蘭攻力都有瑕疵，西班牙仍未搞掂魯爾、費蘭度托利斯同韋拿爭位問題，烏克蘭就過於倚重舒夫真高，樹大招風易被盯死，今仗除咗揀個入球「細」，和波都敲得過，因為足智彩刻意壓低今仗和局賠率，只得3.15倍，0:0同1:1更加係小弟心水波膽。
德國鬥志毋庸置疑
如果繼續跟路行，德國入球大真係值得再追，德國今場有隊長波歷克復出，如果今仗贏埋波蘭，出線機會真係達到9成，德國全力進攻爭取入球嘅決心真係唔使懷疑，不過德國嘅後防真係好爛，連英超落唔到班嘅雲祖柏，都可以兩破德軍防線，雖然德國門將列文今場可能唔出得，由簡尼頂上，不過講真簡尼今季喺拜仁都經常「蝦碌」，唔講得穩陣過列文。
突尼西亞對沙地阿拉伯，小弟就唔會推介，如果我話好熟呢兩隊波，各位都唔信啦，不如瞓番陣，儲足精神睇德國對波蘭好過啦。
文：牽牛