今日，想同大家講兩個戰場同商場戰術運用嘅例子。第一個例子，就係講法國政府嘅防禦邊境侵略戰術。第二個例子，就係講當年梅鐸（RupertMurdoch）擁有嘅新聞集團（NewsCorporation）點樣喺推銷佢嘅收費電視BSkyB畀前宗主國嘅市民。
二十世紀初第一次世界大戰之後，法國因為經過50年內兩次被德國侵襲，就開始諗計仔去研究點樣先至可以唔再被德國攻擊。法國政府諗咗好耐之後，就決定興建一條「二十世紀初版」嘅萬里長城。呢條法國萬里長城就係叫做MaginotLine（馬奇諾防線），亦因為二十世紀嘅歐洲已經經過工業革命，所以佢哋嗰條萬里長城，亦比祖國嘅萬里長城「先進」，設計上要抵受到第一次世界大戰德軍用過，以鐵路為樞紐供應補給樞紐嘅戰術，法國政府喺條萬里長城起咗各式大炮、壕溝、堡壘，橫跨幾百公里嘅德、法接壤邊境。
德軍閃電打敗法國
實際上，呢條長城真係可以對抗德軍喺第一次世界大戰用過嘅侵略戰術，不過大家《金手指》fan屎如果好似我咁，當年讀歷史嘅時候非常用功，應該略略記得，法國去到1940年又再一次被德國侵襲。1940年嗰次被侵略，對法國來講，比第一次世界大戰仲差，因為喺第一次世界大戰，法國只係飽受戰亂，而從未需要投降，不過去到1940年，就算有一條法國萬里長城，法國被侵略三個禮拜之後，就完全投降。大家作為我fan屎，都應該估到點解法國就算有一條法國萬里長城，都要投降。因為法國政府冇與時並進，冇諗過新科技、新戰術對防禦邊境侵略帶來嘅衝擊，所以被德軍繞道避過條長城，用閃電戰打敗。
到90年代嘅前宗主國，當時兩大衞星收費電視台，因為用戶數量不足做唔住，搞到要合併保住條命。合併之後被新聞集團管理，管理層第一個任務就係解決用戶數量不足嘅問題。當時佢哋諗到，用戶最肯畀錢睇嘅節目，就係啲現場轉播節目，咁喺前宗主國，最受歡迎嘅現場轉播節目就係足球比賽，所以當時合併之後叫做BSkyB嘅收費電視，就以天價買咗前宗主國超級足球聯賽嘅獨家轉播權。亦非常成功咁吸引咗好多新用戶，令到新聞集團賺大錢。
現場節目再冇獨家
大家可能會問：「孫柏文啱啱前幾日先至講完希臘神話故事，今日又講近代同唔係咁近代嘅歐洲歷史為乜？係唔係想講話收費電視用現場轉播節目，去吸引新用戶呢個戰術已經冇效？」冇錯！今時今日互聯網，想睇任何電視節目，都有兩個方法可以攞個節目返來，第一就係直接攞，不過人多一齊去攞嘅時候就會好慢。所以有人發明第二個方法，就係攞節目嘅人一路抄節目，就一路被其他人抄佢已經攞咗返來下載嘅節目部份。就好似抄有一百條題目嘅數學功課，學生A抄學生B，學生C就可以抄學生A同學生B，學生D就可以抄學生A、B、C，令到愈多學生同時間抄功課，大家集體抄功課嘅速度就愈快。
咁現場轉播節目，就係一種會有好多人同時間互抄嘅環境，所以有互聯網，就唔需要畀錢睇「獨家轉播」嘅收費電視。大家可以去到www.ppstream.com去睇吓。試問，邊會有人再因為現場轉播節目，去特登買收費電視服務睇？同埋邊會再有收費電視，以天價買獨家轉播現場節目權？所以我相信，到2010年，大家喺免費電視都可以收睇下一屆世界盃。不過如果再有收費電視，以天價買下一屆世界盃獨家轉播權，我只可以為該收費電視台公司嘅股東擔憂。
孫柏文