譚詠麟有份投資的食肆前晚舉行開幕剪綵，他看見陳友太太，即大叫她做「港男媽」，皆因陳友兒子陳良韋正是候選港男。阿倫自爆是他提議陳良韋參選，但他說完即知道記者欲問他兒子長大後會否讓他參選港男，於是大笑說：「大家都係未知數。」
譚詠麟投資的正斗金廚於黃埔的分店前晚開幕，他帶同一班圈中好友包括余文樂、黃伊汶（Emme）、黃家強、溫碧霞及陳文媛等往剪綵，阿倫表示繼94年投資天天漁港後，很久沒有開食肆，今次總投資額達八位數字，在跑馬地已有過萬呎店舖，而他最愛往吃雲吞麵。問到其子譚曉風可有同往？阿倫說：「未嚟過呢間，跑馬地就去過，𠵱家先開埋黃埔同澳門分店啫。」
拒談家事
阿倫不欲多談兒子，因此故意扯開話題，他謂當年天天漁港結業，是因不想殺生，他說：「嗰陣都好彩，關門後先有霍亂同加排污費，海鮮日日賣唔去就要丟，損失比較大。」
對於早前被拍得與女友Wendy拍拖看戲，阿倫說：「咁簡單嘅嘢唔使問啦，我一星期睇幾次戲，影到好好彩咩？我哋唔使成日將家人放喺嘴邊嘅，邊個藝人成日將家人掛口邊而又成功㗎？冇嘛，係咪想我退出呀？」再問阿倫會否讓子承父業，他說：「成功先算啦。」
後來阿倫見到陳友太太，主動叫她做港男媽，阿倫說：「係我叫佢推薦個仔去參選㗎。」有記者打算追問阿倫會否讓兒子參選港男，但問題未出口，阿倫即醒目地說：「十年樹木，百年樹人，大家都係未知數，你估我唔知你哋想問乜咩！」
此外，Emme透露稍後環球會為她出碟，對於早前阿倫炮轟環球宣傳不力，她說：「我相信經校長洗禮完就冇問題，溝通嘅嘢上面去搞，我做細嘅唔方便講咁多，不過公司好好，畀到錢我做碟，今次都搵外國製作人幫手。」
採訪：李珮洳
攝影：仇志德
