機場管理局行政總裁彭定中噚日突然響董事會例會上話唔再續約，做埋今年底就拜拜鬆人。呢個消息簡直震撼航空界，事關彭定中過去5年半全力推動機場發展，為籌備機管局上市，做過一百幾十場海內外推介會，四周圍推銷香港機場，表現稱職，冇理由未等到機管局上市就鬆人㗎？
聽講，彭定中同朋友輕描淡寫咁解釋，自己今年已經62歲，過咗退休年齡，做埋今年，已經響機管局做咗6年，夠晒皮，耐不耐都會計劃吓退休嘅生活咁話。
機關阿頭齊執位
但係，華華打死都唔信彭定中為咗退休而辭職，如果真係咁簡單，機管局中人使乜如臨大敵，冇人夠膽講呢單嘢。一定有內情。華華早前同官府中人食飯，佢哋都露咗多少口風，話有啲人人工好高。唉，錢又唔係自己嘅，做乜咁緊張呢？不過一朝天子一朝臣，特首曾蔭權舊年中頂咗董建華個位後，都好多位執過啦，港交所、證監會，旅發局以至大學等等最近都換緊阿頭。彭定中係老董01年搵入去嘅，就算交足功課都冇計。佢一早聞到自己冇得留低，自然識做啦。
最明顯係，雖然機管局舊年賺成14億，但彭定中嘅bonus反而減咗40萬，即係成份薪酬減少4.2%喎，話冇嘢至奇啦。
機場係香港經濟重要嘅一環，政府舊年中已經換咗民建聯前主席兼行政會議成員曾鈺成，同資深大律師兼行政會議成員廖長城等人入機管局董事會。出年選特首，又係分餅仔時間，彭定中冇得留低，咁又多個位啦。
李華華