德國隊首戰哥斯達黎加，令到華度留下最深刻印象係佢哋有唔少入波板斧。前鋒高路斯及普多斯基，一前一後柱走位默契唔錯；舒韋恩史迪加及舒尼達為球隊提供的中場攻擊力量亦非常足夠。不過係防守方面，一對中堅梅迪薩卡及梅斯達似乎仲未夠靈活，遇着有計破對手越位陷阱球隊，就好有失守危機。相信德國以上嘅優點缺點，香港球迷觀眾都可以喺電視直播中感受到多少。
波蘭實力有限勿憧憬
波蘭方面，首戰對厄瓜多爾負0:2，抵輸！呢班波完全表現唔出水準，不過睇佢哋整體球員質素，即使表現得出水準，戰力亦有限。波蘭戰術上亦無哥斯達黎加咁細膩，呢場波計正路應該畀德國剋住。
寫呢段稿之前，華度啱啱喺萊比錫返到法蘭克福，途中要喺Fudal呢個德國小市鎮轉車。見仲有時間，就喺火車站周圍行下；見到間網吧，但入面得嗰幾部電腦，上網地方佔舖位唔到三分一地方，原來內有乾坤。呢間嘢有個莊家做緊世界盃波盤，算係當地外圍佬；外圍佬知道華度來意，又見係亞洲人，搭晒膊頭開晒佢嘅分組賽歐洲盤出嚟。
呢啲賠率使鬼喺度睇咩，梗係問下佢德國對波蘭有冇料到啦。意料之內，德國人都係捧番德國隊，但外圍佬話咪咁樂觀，佢估最多贏1球，華度都係咁話！
文：華度
華度心水：讓球主客和：德國和[-1]