作為人類去愛護小動物，老實講真係幾應份。難道你見到一隻可愛小狗喺你面前，你仲可以狠下心腸，踢牠一腳、燒佢條尾？上星期有電影公司聯同保護遺棄動物協會（SAA）及UA皇室戲院就為新上畫的電影《再見！流浪犬》舉行人狗電影專場，當晚一眾狗癡，帶同自己的愛犬排排座，一齊睇戲。平時愛狗一族最多只可以喺屋企同狗狗睇戲，今次呢個別開生面嘅「人狗會」屬全港首次，當然唔會錯過！
記者：羅灝汶
攝影：周旭文
全港首創狗戲院
坦白講小記都係愛狗一族，當第一次收到通知可以帶狗仔睇戲，真係覺得新奇又有趣。除咗湧出興奮的心情外，仲有大量疑問：「如果狗仔睇戲時，大小便會點算？」「場中有幾十隻狗仔，會唔會有傳染病？」「會唔會有狗虱？」「如果狗仔睇戲狂吠，點收科？」「完場後，戲院如何善後？」……查實一切都唔使擔心嘅，因為呢場由電影公司聯同保護遺棄動物協會（SAA）及UA皇室戲院聯手炮製的全港首個攜犬睇戲的專場，電影公司方面一早已經同戲院商量妥當，事前同善後工作都做到足。
今次入場嘅狗仔約80隻，放映途中竟然冇乜狗仔出聲吠，都好乖喎！除咗開場時，有隻頑皮嘅史納莎比較情緒不穩定。但當熄燈後，全部狗仔都乖乖睇戲，就連中途離場或者去廁所的狗隻也沒有。完場後訪問狗主，佢哋都話其實只要狗仔唔落地，有主人抱着，係唔會隨處便溺嘅！原來帶狗仔睇戲都可以咁靜，真係估唔到。
規條：入院不落地
完場後特別消毒
香港都算係第一次搞狗戲院，點解咁有創意呢？戲院負責人Vicky話：「今次搞人狗電影欣賞係片商嘅概念，而且香港嘅戲院從來未搞過可以帶狗仔一齊睇戲嘅活動，所以今次片商包場的建議，我哋好快就接納咗。至於清潔問題，完場後已經請咗清潔公司，特別為該場次清潔消毒，保證唔會影響其他客人。」
因為戲院同電影公司都係首次搞此類活動，所以特別請來SAA來到會場控制秩序，會長阿EL話：「今次我哋都好樂於幫助控制場面，例如狗廁所、量度狗隻Size，同訂立守則等等，希望可以令到電影順利舉行。其實外國都有好多露天汽車電影院，可以人狗睇戲，不過香港就從未試過，所以我哋都好興奮呢！」
狗觀眾直擊
只演一場兼做善事
今次「人狗電影欣賞會」，對於每一個狗主來講都非常有意義。觀眾只要用正價$65購買2張《再見！流浪犬》戲票，就可以攜帶1隻愛犬入場欣賞電影，入場狗主仲可以得到紀念品，當中有一本精美狗仔日記及VIDCard（VeryImportantDog）。而此專場後凡購買《再見！流浪犬》戲票１張，其中$1會捐贈支持SAA，睇電影兼做埋善事咁話。
點解會促成今次合作呢？原來香港遺棄動物的問題相當嚴重，每年都有超過一萬隻狗因各種原因被遺棄，而大部份沒有被領養的狗隻最終都會遭人道毀滅，SAA就一直都幫助被遺棄動物尋找合適的家園。咁蹺今次電影《再見！流浪犬》的拍攝主旨同SAA的宗旨不謀而合，都是希望大家正視遺棄動物的問題，所以電影公司亦選了SAA成為《再見！流浪犬》的指定受惠機構。
狗主有Say：
開場前Snap
