菠蘿文:呵……畀杯熱奶茶,菠蘿油烘底唔該。
侍仔:你有無講錯呀?菠蘿油可以烘底食嘅咩?
菠蘿文:係呀,我自己創嘅,正如前晚我推介畀你哋嘅意大利上盤一樣,我啱啱都去馬會收咗錢。
招積域:我前晚捷克「大」都收咗錢,贏咗嘅夠做旅行水腳。
侍仔:你去邊處玩呀?
招積域:去台北玩3日咁啦,過去睇吓親戚同埋大學同學,話晒都成3年無見,一陣返屋企執行李。
菠蘿文:記得買手信畀我啦,你走之前有咩心水畀我哋先?
招積域:烏克蘭下盤啦,再串埋沙地阿拉伯「大」。烏克蘭唔係勁旅,但西班牙都無讓波理據,隊中3個前鋒得韋拿同F托利斯可用,魯爾隱形唔係第1日嘅事。
侍仔:你講得都啱嘅,西班牙成日令人失望,真係「外圍賽之王」,得個樣。
菠蘿文:我覺得突尼西亞可勝沙地阿拉伯,班有錢人10年前就威,但𠵱家就差好多啦,唔似得伊朗咁樣,有球員去踢德甲,身體質素又好啲。
招積域:但其實兩隊實力差不多,都以打地面戰及快速反擊,呢場我都係買個和同「細」算啦,唔熟嘅波唔玩咁多。
菠蘿文:第2輪分組賽又開始,唔知波蘭係等劏定係贏埋主隊呢?
侍仔:波蘭都係「外圍賽之王」㗎啦,兩屆決賽周都踢得漫不經心,輸波唔好賴教練排個陣係4-5-1定係4-4-2,千里達連約基都瞓晒身鏟波,10打11都打和埋瑞典,睇吓你肯唔肯搏命踢。