香港工業總會總裁邱繼龍噚日請傳媒食飯，介紹吓佢哋嘅青年工業家獎計劃，仲呼籲業界快啲報名，下月初就截止，頒獎禮會喺11月舉行。
席上佢提到近年廣東省好注重環保，計劃將污染類別嘅工業，好似電鍍、漂染、印刷、電路板等調遷到邊遠地方，唔使影響民居，呢點工總好理解，但要一刀切兼喺今年中落實就有啲問題。幸好經游說後，當局已非官式容許將時限延遲至今年底。
佢話今次嘅政策影響都幾深，直接涉及本港千家企業，如果計埋上下游嘅供應商同客戶，則共數萬家。
對於廣東省治安欠佳，工總亦安排喺本個月19日同廣東省治安廳會面反映情況，希望加派人手巡查。至於由年中開始廣東省各地先後會調高最低工資水平，佢話大多港商已畀高於新最低工資水平挽留員工。