難得有機會來到德國採訪世界盃，當然要將所有具德國特色嘅城巿、食物、名勝或好去處介紹畀觀眾。
早幾日有線直擊隊到過德國慕尼黑嘅LEGOLAND，地方大到成個主題公園咁；如果小朋友嚟到，肯定玩到唔捨得走。話到明LEGOLAND，公園入面所有展品當然係用Lego砌成，基本上諗得出嘅佢入面都有：建築物、交通工具、大炮、人像等，通通都難唔倒佢哋，仲好逼真㖭！
安聯球場砌得好逼真
今屆德國世界盃，揭幕戰喺安聯球場（世盃期間改名為慕尼黑世盃球場）舉行，呢個設計咁獨特嘅球場，自然成為公園入面嘅焦點所在。其實，呢座砌出嚟嘅安聯球場唔單止外形相似，就連球場入面嘅設施、座位、觀眾席等，都巨細無遺咁顯示出嚟；用數碼相機拍低的話，離遠望埋去仲以為真係影緊安聯球場呢！
細路仔時都有玩過Lego，最鍾意嘅呢就係砌飛機，不過嚟到呢度展出嘅飛機就唔再係好似以前嗰啲咁簡單。其中有一款係成架最新嘅空中巴士A330型號。至於成個公園最特別嘅作品，你估係乜嘢？提示：同世界盃有關。
碧咸像竟似朗尼
答案就係英格蘭球星。佢哋已經成為公眾人物，就連香港嘅山頂蠟像館都有碧咸嘅蠟像。呢度仲勁，唔單只有碧咸，連佢老婆維多莉亞都有，而且仲着得幾性感㖭，絕對係全場最特別。不過，Lego像嘅碧咸就唔多似，反而似佢隊友朗尼多啲；至於Lego維多莉亞都算0K啦。
有線06世界盃嘉年華，將於今晚7:00pm——9:00pm，播出世盃外景隊採訪滙報
