環球股市連環跌，美股跌完到日股，到港股，到歐洲股，又再到美股。恒指一散，就係387點。圖表派昅住嘅250日平均線15282，就失守過你睇，恒指收15234，「破位」48點。H指250日平均線在5697，昨日5953，仲相差256點先至到位。以250日線做標準，H股個勢仍然凶險，驚未跌夠。
H指P輪4842：如果認為H指未跌夠，做淡友，可以揀H指P輪4842。隻輪9月尾到期，輪價33仙，溢價2.4%，槓桿率6倍（有效4.3倍），引伸波幅36%。賭得狼啲，則向2298落手，贏輸會大過4842超過1倍。
唔慣造淡，則等H指跌多二三百點，低位買H指C輪，揀定4470做目標。隻輪9月尾夠鐘，輪價19.3仙，溢價7.7%，槓桿率14.3倍（有效7.7倍），引伸波幅32.6％，喺乜嘢低位郁手，臨場執生。
國壽P輪4567：國壽（2628）跌0.75元，收10.40元，個勢好唔掂，先幾日有大量拋空，恐怕10元話破就破。揀國壽P輪玩，4567比較正路。隻輪11月尾到期，輪價1.30元，溢價7.9倍，槓桿率8倍（有效3.9倍），引伸波幅40%。唔慣造淡，則等國壽跌到9個幾，買C輪4791。
章盛