今屆西班牙響外圍賽唔能夠以首名出線，搞到要踢附加賽，不過最終都不負所望擊敗斯洛伐克，趕上尾班車。西班牙陣中球星如雲，可惜去到大賽例必會走晒樣，令球迷有「雷聲大，雨點小」嘅感覺。近期佢哋踢過4場友誼賽，表現都算對辦，先後擊敗兩支決賽周球隊科特迪瓦同克羅地亞，錄得3勝1和嘅佳績，不過友誼賽始終唔能夠作準，事關好多球隊都藉住友誼賽去試陣。
捧烏克蘭讓球客勝
首次晉身決賽周嘅烏克蘭，響外圍賽嘅表現令人刮目相看，能夠力壓土耳其、丹麥同希臘等有份量嘅球隊，以小組首名取得出線權，但係呢班波嘅攻力唔算太好，響12場外圍賽只係入咗18球，好彩佢哋嘅防守力就絕對唔失禮，只係失過7球，亦都係同組防守力最強嗰隊，雖然今場對住西班牙未必可以贏，但有力摸和對手，一於揀讓球客勝。
啤酒國好在攻力夠
另一場心水係德國主場對波蘭。德國雖然後防不穩，但勝在有攻力搭夠，睇過揭幕戰對哥斯達黎加場波就知。相反波蘭就令人相當失望，前線攻力麻麻，中場創造力低，後防又唔穩陣，今場對住主辦國德國輸波都係好正路嘅事。不過德國都有個豆腐後防，穩陣起見都係揀主客和嘅主勝。
陳樹鵬（阿鵬）
有線球彩台主持
電郵：[email protected]