荃灣區除咗有唔少一手發展商大賺、二手小業主蝕到喊嘅新樓盤，亦係新界西其中一個最旺嘅社區，一個禮拜七日由朝到晚，一街都係人，唔理商場或者街舖，零售飲食業都好旺，商舖租務同買賣都有唔錯嘅交投量。
世紀21李鳳嬌報料，區內除咗大碼舖位多投資者捧場外，商場細舖都有唔少人吼，好似荃豐商場地下，179呎舖，成交價278萬元，呎價1.55萬，連租約，𠵱家收緊1.3萬蚊租。另外，華都商場2樓491呎舖，83萬賣咗，都係連租約，租金6300蚊。商場舖買賣都算旺，租金都做得唔錯，好似昌寧商場1樓546呎舖，由食肆以2.6萬元承租，呎租47.6。
另外，中原黃金鳳話，南豐中心2樓3075呎大舖，由連鎖粥店以14.5萬承租，每呎都係47蚊左右。