訪問世界盃爆Show王：球星當然冇我份、克勤、阿叔、阿澤……又做到爛，一於向講波一族埋手，原來一個足球，竟然令平凡得很的她和他，晚上變身成講波一族。足球員走去做講波好正路，丘仔、細鬼都係咁，但你有沒有想過你阿Sir、秘書都係他們其中的一分子？
記者：陸伊琳
攝影：周旭文、譚盈傑
唔識波OL學講波
自從有線球彩台開台以來，最離奇的職業出現了─唔識波的講波女主持，睇波的男觀眾話，她們的工作就是笑（造氣氛），同埋被人笑（唔識波）。陳思琦（Rita）就是當中一分子，中學畢業後從事文職工作，做過Sales&Marketing，現職秘書，兩年前經朋友介紹，搵來球彩台主持呢個副業。「點入行？有冇俾觀眾攞便宜？你究竟識唔識波？」一輪嘴問題傾巢而出。爽朗的Rita：「兩年前經朋友介紹來試鏡，就係咁簡單，坦白講我之前真係唔識波，公司主要係想搵個開朗、識搞氣氛的主持，不過加入後，就要狂刨本地外國雜誌及上網來惡補，如果唔係點同觀眾搭到嗲！」記者出幾題簡單足球常識題考考佢：英格蘭左、右中場係邊個？賭波3串1、膽拖的玩法……她竟然一一答到，不過之後講開千里達對瑞典，她遊魂話係瑞士唔係瑞典，老貓燒鬚！
筍！攞一個月假賺外快
Rita感謝日頭老闆的體諒及遷就，「老闆同事成日問我攞貼士，都幾好笑，我老闆屋企冇有線，叫我錄波畀佢睇，佢好認真，睇完仲畀吓意見我，叫我講嘢唔好咁快。」老闆真係對Rita好好，世界盃期間俾佢攞1個月無薪假，方便佢秘撈，錯，係明撈先啱。工作關係，佢愛上足球，亦明白了足球比賽並非「一班人將個波踢來踢去」咁簡單，球員的狀態、領隊的戰術運用、臨場表現等許多因素，都可影響球賽的勝負。好希望可提供更多獨到「貼士」給球迷外，更希望證明畀男仔睇，女球迷都好識波！
講波財源滾滾
做主持帶來知名度，隨之帶來有機會拍廣告、雜誌報紙的撰稿。Rita表示決不會放棄日間正職，因為老闆同事都好好，而講波的收入可以係一個好可觀收入的兼職，但不足以維持生計。雖然Rita死口都唔肯講講波後帶來的收入有幾多，但知道她接拍廣告的價錢是貼近藝員價介乎5位數字，而撰稿約叫價$1一隻字，講波副業有近萬元，保守估計，世界盃期間這個月收入都突然多咗幾萬元，幾和味！
Rita（陳思琦）
職業：秘書、球彩台主持
最愛國家隊：意大利、阿根廷
估計世界盃收入
廣告費：5-8萬元
主持收入：約1萬元
報紙雜誌撰稿費：5千元
保守估計世界盃收入：6.5萬元
我阿Sir係講波佬！
榮基的故事更有趣，日頭高中教西史，阿Sir去講波？榮基糾正我：「係講波佬去教書先啱。」97年投身有線做足球評述員，99年加入教書行列，「因為自己鍾意歷史，工作實際又穩定，而講波係我的夢想。」榮基表示兩份人工相若，暫時都冇諗過放棄其中一份，而且講波係細細個的夢想，「但講波真係好需要體力，要捱眼瞓，可能再做多幾年，老咗身體會負荷唔到。」近排榮基的Job亦顯著增加，有2個在世界盃期間播的廣告亦找他配音（傳聞因為佢把聲幾似林曉峯），除Rita外，他也是世界盃小贏家，兩份固定工作的收入估計加埋起碼5萬元，再加埋配音酬勞，呢個月分分鐘有6位數字落袋！
講書似講波「太快！」
講接Job，榮基話會適可而止，「我係教師，我唔會掂賭波，講波同教書沒有衝突。只係要時間上的分配及協調，我每個星期平均都只花一、兩日去講波，其餘的時間留番畀屋企人及學生。」世界盃期間，榮基日頭亦如常上學，德國的波一定講，因為熟，至於其他多選擇在周末時間講，佢話學校同電視台都好肯去遷就。「學生知道我講波，無疑拉近了距離，關係也易建立，在學校我自己有個共識，就係絕少提講波的事，但學生有時會拉埋我一齊講，試過有學生埋怨可唔可以講書講得慢啲，唔好好似講波咁快！」榮基笑一笑話「又係喎。」榮基在講波界有資訊王之美譽，同他教西史都有關，記性好嘛！
李榮基
職業：中學教師、足球評述員
最愛國家隊：德國
估計世界盃收入
教書：2.6-2.7萬元（教7年書，政府起薪22點）
講波：約2萬多元
2個講告配音：5-7萬元（香口膠廣告配音、運動品牌廣告配音）
保守估計共10萬元！
編劇變幕前寫埋旅遊稿
世界盃大變身又豈止榮基及Rita，四小強的肥Sam亦是一樣，他前身是編劇、雜誌廣告的撰稿員，因為四小強的Project，同電視台開展了合作的關係，他的作品有鄭伊健及阿Sa的《阿孖有難》，及近期彭氏兄弟的《鬼域》。本來以為回港後會多留守幕後，但電視台加碼要求他做幕前，還有一連串的報紙、雜誌約稿，寫的唔係波，而係旅遊，叫價$1隻字，呢個價錢行內都算好OK，甚至有人叫他出旅遊書，世界盃也帶挈了肥Sam紅起來！
另一隻小強馮奇（馮嘉奇），由足球員變評述員不奇怪，奇在因為小強單80日環遊世界令他失去足球員一職，但兼職亦只係寫一點稿，廣告配音？據知佢依然多懶音，未得住！咁佢咪係世界盃輸家？咁又未必，「今次有份參與其中，係做三世人都未必有嘅機會，賺咗嘅係經驗、見識、更懂得珍惜身邊一事一物。踢波我一定會繼續踢，世界盃後我會重返足球員的身份。」
肥仔聰世界盃賺過百萬?
肥仔聰3個月前被委任為「有線世界盃嘉年華」的製作總監，世界盃期間晚晚喺電視見到佢，雖然我唔知佢袋了有線幾多酬金，但佢話為了呢單Job推了一套30集的劇、電台節目、商場Event，加加埋埋百幾200萬元，咁豪？估計有線都待佢不薄啦，打個五折都成百萬啦！
Viann：世盃勁推Job
肥仔聰介紹Viann做嘉年華主持，呢段期間增加不少曝光率，亦把主持經驗再下一成，雖然Viann話：「為世盃，甚麼公司主持、港台劇、商場Show都要讓路！」但咁講都係唔夠肥仔聰慘，始終都係第一次擔咁大型的LiveShow，賺晒！
彭敬慈賺曝光率
永遠只記得係「梅姐徒弟」的彭敬慈，擔任嘉年華舞蹈總監，舞起世界妹，彭敬慈舞功了得家，但星運麻麻，但最近晚晚見佢跳舞，曝光率激增。
大頭仔處處有地盤
球彩台的大頭係波盤雜誌總編輯，電視、電台、雜誌、網站處處都有佢的地盤，佢強項係分析，做主持後唔少人都爭相搵佢寫波經。世盃忙到七彩！
