香港人每年都買成兩萬幾個內地住宅單位，總值超過100億，市場潛力好大，但係買家可能對內地市況同買賣法規等未必好熟。
中原出版社睇準呢個機會，出咗本「中國地產GUIDE」，介紹內地9大城市嘅樓市走勢、置業交易費用及稅項，仲有指標建築同今年最具投資價值樓盤推介，夠晒創新。
唔單止咁，本書又有當地重要機構、銀行、酒店、航空公司、醫院嘅地址、電話或網址，夠晒齊全方便，另外又介紹特色食肆，咁返內地睇完樓，都唔使擔心唔知去邊處至搵到嘢食。拎住本書返內地呢9個城市，遇到問題查吓本書就掂嘞。
中原話會印幾千本書，今個禮拜中起喺三聯同商務等各大書店有得賣，每本80蚊；另有1000本會供員工內購，已有20幾本有人認頭嘞。聽中記內部講，集團主席施永青諗住每年都出書，想每個城市出一本喎。
中原中國董事總經理黎明楷話，中原90年開始進軍內地，𠵱家喺20個城市設有分行。施永青講，集團嘅內地員工近1萬人，舊年做咗10.8萬宗成交，物業總值近1000億。黎明楷又透露，集團喺內地計劃出版一本五冊嘅中國房地產年鑑，每本賣二百零蚊。
電郵地址：[email protected]