呂志和嘅嘉華集團舊年啱啱慶祝成立25周年，遠赴美國、澳門同內地，拍製一條企業影片，內容除咗講旗下嘉華國際喺內地同美國嘅地產、酒店業務，亦提到佢哋近年積極拓展嘅澳門賭業。
咁食得唔好嘥，條靚片自然要攞去參選。終於俾佢哋啱啱攞咗紐約第17屆QuestarAwards企業推廣銀獎。呢個獎由美國MerComm,Inc.在90年喺紐約設立，表揚全球視像傳訊上有卓越成就嘅機構。
講開嘉華，佢哋旗下嘅銀河娛樂，獨家設置快速骰寶同快速輪盤遊戲。將原有嘅綠色絨毛博彩枱面，改為個人電子投注機，賭客將現金投入電子投注機，就可利用面前嘅個人螢幕投注，簡單方便。
連賭都自動化，相比傳統骰寶及輪盤遊戲要3位荷官，唔單止提升效率，工作人員又可騰出嚟做其他嘢，成本少咗仲可以搵多啲錢。