到四季酒店參加港交所六周年酒會，只見人頭湧湧，似乎全部證券界人士都喺晒度，聽完夏佳理、唐英年致辭之後，好多人客離場，酒店大門外排晒長龍，等司機啦、等的士啦，不一而足。左丁山排的士隊，前面一位，啱啱就係測量師兼馬主T先生，跟住後面嘅係會計師兼馬主F先生，馬主F原來唔係等的士，而係等司機，半分鐘之後，一架墨綠色積架駛至，於是馬主F與我哋拜拜。
好多車駛過，都係平治寶馬，只有馬主F坐積架，有啲性格噃，馬主F係老一脫人，坐積架係要經典墨綠色先至有型嘅，其他顏色唔啱睇。馬主T與左丁山排隊之時，自然講起買馬賽馬。馬主T真巴閉，隻馬今季贏咗五場，問佢使唔使用咗百幾萬港紙買馬，佢竟然話：「係用咗一百萬，不過買咗五隻！」據佢解釋，兩年前佢哋成班人到紐西蘭參加卡拉卡拍賣會，用一百萬港元一共買咗五匹，經過一年培訓、試閘之後，馬主F決定賣走三隻，其中一隻嚟咗香港，已經贏咗兩場，一隻在紐西蘭跑，已經贏馬。馬主F認為最好嗰隻，預備過嚟香港，點知竟然足部作痛，唔跑得，你話幾激氣呢。養馬最緊要有耐性，馬主T覺得既然已經封咗蝕本門，賣咗三隻已經收回成本，怕乜慢慢等啫。卒之等咗一年，等隻馬好番，先至運嚟香港，果然一鳴驚人，一季贏五場，羨慕死其他馬主。
左丁山話：「你買馬既然咁有眼光，不如兼職做埋馬販，或者買馬當作投資，話唔定可以養番一匹名種？」馬主T話：「第一次係夠運啫，自己未必真係咁叻。不過見到成績咁好，都想再去拍賣會考考自己眼光。」叻也好，夠運也好，總好過大馬主用成千幾萬買四隻馬，養足三四季，竟然贏唔夠五場。做馬主最過癮之處，就係刀仔鋸大樹，唔係賭馬贏大錢噃，而係用二三十萬港元買一隻馬，可以贏六七場頭馬，贏到上精英班。嗰鋪威風法，難以形容。